Sunday December 22, 2024
वि.सं
२०८१ पुष ०७ आइतबार
गाउँ छोडी शहर तर्फ बसाई सर्नेहरुको लर्को चलिरहेको बेला, त्यसको विपरित काठमाण्डौमा रहेको आफ्नो घर बेची मान बहादुर खड्का वि.सं.२०६८ सालमा, आफ्नै जन्मथलो ओखलढुङ्गाको खिजीदेम्बा नै फर्किए । संभावनाहरु खोज्दै, वि.सं. २०७१ सालमा “यशोदा एग्रो बाख्रा फार्म” नामको फर्म दर्ता गरी, ब्यवसायिक बाख्रापालनको शुरुवात ७ वटा बाख्राबाट शुरु भयो । २०७२ को महाभुकम्पले उनी र उनको बाख्राहरुको उठीबास बनायो तर उनको ईच्छा ज्यूँका त्यूँ रह्यो । छरछिमेक र ईष्टमित्रहरुसंग सयकडा २÷३ मा ऋण लिई पुनः एउटा खोर ठड्याए र २० वटा स्थानीय जातको बाख्रापालनलाई पुनर्जीवन दिए । महङ्गो ब्याजको ऋणको भार कम गर्न जिल्ला सदरमुकाममा रहेका बैंकहरु धाउन थाले तर, ऋण पाउन निकै गाह्रो भयो, कारण थियो सदरमुकामबाट टाढा र धितो राखिने जग्गाको मूल्य अति न्यून ।
संस्थागत कर्जा विहिन भौंतारिएका मान बहादुरको बाख्रापालन प्रतिको मोह र योजनालाई मुक्तिनाथ विकास बैंकले सहर्ष स्वीकार गर्यो र उनको जीवनमा पहिलो पटक बैंकिङ्ग कर्जा रु.१० लाख लिएर आधुनिक खोर निर्माण गरे, ५ वटा बोयर जातको बाख्रा थप गर्री व्यवसायलाई सबलीकरण गरे । २०७६ साल आषाढमा उनले रु.२५ लाख सहुलियत कर्जा लिएका छन् । हाल बोयर र लोकल जातका गरी ११३ वटा बाख्रा रहेका छन् भने खोरलाई आधुनिकीकरण गरेका छन् । अघिल्लो वर्षमा उनले ३२ वटा बोयर जातका बोकाहरु बिक्रि गरी करिव रु.२० लाख आम्दानी गर्न सफल भए । उनको फार्ममा एउटैको ५ लाख मुल्य पर्ने बोकाहरु रहेका छन् । विगतमा अर्काको कम्पनीमा काम गर्ने मान बहादुर, आज ५ जना युवाहरुलाई रोजगार दिन सफल भएका छन् । उनी भन्छन् ः “अर्काको भूमीमा गई पसिना बगाउनु भन्दा, आफ्नो परिवारसँग हाँसीखेली यही ब्यवसाय गर्ने हो भने सयौं गुणा खुशी मिल्दछ ।” त्यो खुशी उनको मुहारमा छर्लङ्ग देखिन्छ ।
