Friday April 26, 2024
वि.सं
२०८१ बैशाख १४ शुक्रबार
धादिङ जिल्ला धुनिबेशी न. पा. वडा नं. ८, खानीखोला, (चाईनिज ईट्टाभट्टा) निवासी वर्ष ३८ का श्री सुवाश श्रेष्ठ उत्कृष्ट कृषकहरु मध्येबाट एक उदाहरणको पात्र हुनुहुन्छ । उहाँको परिवारमा आमा, बुबा, श्रीमती, २ छोरा र १ छोरी गरी ७ जना हुनु हुन्छ । पारिवारिक दायित्व पुरा गर्दै आफ्नो आश्रित परिवारको पालनपोषणको लागि रोजगारी खोज्दै विभिन्न देश भौंतारिएतापनि बैदेशिक रोजगारीले नत सन्तुष्टी दियो नत आय आर्जन नै । २०६४÷०६५ साल तिर उहाँ कतार जानु भयो, तर अपेक्षा गरे अनुरुप कमाई नभएपछि १७ महिनामा नेपाल फर्किनु भयो । त्यस पछि कुवेत जानु भयो, त्यहाँको गर्मी सहन नसकेर ३ महिना मै फर्किनु भयो । फेरी, दुबई जानु भयो, दुबई बसाई पनि कष्टकर भयो र १ वर्ष मै फर्किनु भयो । अन्तिम पटक साउदी अरब जानु भयो, अरु देशमा भन्दा त्यहाँ अलि धेरै समय बसे पनि कमाई भने भएन । यसरी ४ ओटा देशमा कुल करिव ८ वर्ष विदेश जाने र आउने गरे पनि हातमा केही आएन । पटक पटक अर्काको देशमा भौंतारिएर हिडी रहनु भन्दा अब जे गर्नु पर्दछ, यही आफ्नै देशमा गर्ने अठोट लिएर कृषिमा रहेको संभावनाहरुलाई व्यवसायिक पेशाको रुपमा विकास गर्ने अठोट गर्नु भयो । त्यही अठोट र मेहनतले उहाँ आज एक उत्कृष्ट र सफल कृषकको परिचय बनाई सक्नु भएको छ ।
उहाँ व्यवसायिक कृषिमा होमिएको करिव ५ वर्ष भयो । अहिले करिब १२ रोपनी जग्गा भाडामा लिई विभिन्न प्रकारका तरकारी खेती गर्दै आउनु भएको छ । उन्नत जातको बीउविजनबाट उन्नत तरिकाले खेती गरी उन्नत कमाई गर्न सफल हुनु भएको छ । यो पेशाले उहाँको सबै परिवारलाई क्षमता अनुसारको रोजगार पनि दिएको छ । हिजोआज, ४ रोपनीमा काउली खेती, ४ रोपनीमा फर्सी खेती र ४ रोपनीमा सिमी लगाउने कार्यमा व्यस्त हुनुहुन्छ । सिजन अनुसार हरेक पटक (४÷४ महिनामा) रु. ४ देखि ५ लाख सम्म कमाई गर्न सफल हुनु भएको छ । वार्षिक रुपमा यति कमाई विदेश बस्दा कहिल्यै भएन । हाल सम्मको कमाईले ४ कोठे आर. सी. सी. घरको पहिलो तला बनाई सकेर दोस्रो तला फिनिसिङ गर्दै हुनुहुन्छ । तरकारी खेती वाहेक १ ओटा उन्नत जातको गाई र ८ ओटा बाख्रा पनि पाल्दै आउनु भएको छ । आजभोलि दैनिक ९ लिटर दुध बेच्नु हुन्छ र त्यही आम्दानीले घर खर्च चलेको छ । तरकारी खेतीको आम्दानीले कर्जाको किस्ता, व्यवसाय विस्तार र घर निर्माण गर्दै आउनु भएको छ । तरकारी खेती र कृषि कार्यबाट नै आम्दानी, बचत र सम्पत्ति जोड्न सकिने उदाहरण उहाँले देखाउनु भएको छ ।
उहाँ भन्नु हुन्छ, “विदेशमा गर्ने जति मेहनत यहाँ गर्ने हो भने त सजिलै सुन फलाउन सकिन्छ” । ८ वर्ष सम्मको बैदेशिक रोजगार र यात्राले उहाँलाई पाठ सिकाएको छ । यहाँ रहनु भएका युवाहरुलाई नेपालमै बसेर आफैले केही स्वरोजगार हुने पेशा÷व्यवसाय अंगालेमा यहीं पनि मनग्य आम्दानी गर्न सकिन्छ । अर्काको देशमा मेहनत, पसिना र बल बेच्नु पर्दैन भन्नु हुन्छ । कृषि उपजको बजार व्यवस्थापन र मूल्यको सुनिश्चतता भए कमाई अझै बढ्ने संभावना उहाँले देख्नु भएको छ ।
मुक्तिनाथ विकास बंैकको लघुवित्त कार्यक्रम अन्तर्गत पुरुष समूहमा आवद्ध भई विगत ३ वर्षदेखि निरन्तर बचत तथा कर्जाको कारोबार गर्दै आउनु भएको छ । सम्पूर्ण बैंकिङ्ग सुविधा मुक्तिनाथबाट नै पाएकोले आफू सन्तुष्ट रहेको बताउनु हुन्छ ।
